Ijtimoiy tarmoqlarda Toshkentdagi “O‘rikzor” bozorida yong‘in sodir bo‘lgani haqida tarqalgan xabarlar yuzasidan Favqulodda vaziyatlar boshqarmasi rasmiy ma’lumot berdi.

Qayd etilishicha, 4-iyul kuni soat 04:26 da Toshkent shahrining Uchtepa tumanida, Toshkent halqa avtomobil yo‘li ko‘chasida joylashgan “O‘rikzor” bozoridagi do‘konlardan birida yong‘in yuz bergani haqida xabar kelib tushgan.

Voqea joyiga qutqaruv ekipajlari soat 04:35 da yetib borib, yong‘inni soat 04:48 da qurshab olgan. Yong‘in esa soat 05:01 da to‘liq o‘chirilgan.

Dastlabki ma’lumotlarga ko‘ra, hodisa oqibatida oziq-ovqat do‘koni 150 kvadrat metr maydonda yonib zararlangan. Yong‘in sababli jabrlanganlar qayd etilmagan.

Ayni paytda yong‘inning kelib chiqish sabablari hamda yetkazilgan moddiy zarar miqdorini aniqlash ishlari olib borilmoqda.