Rossiya 2-iyulga o‘tar kechasi Ukrainaning poytaxti Kiyevga raketa va dronlar yordamida keng ko‘lamli zarba berdi. Hujum oqibatida kamida sakkiz kishi halok bo‘ldi, o‘ttizdan ortiq fuqaro jarohat oldi. Dastlab shahar harbiy ma’muriyati uch kishi halok bo‘lgani va 25 nafar jabrlanganini ma’lum qilgan. Keyinchalik Kiyev meri Vitaliy Klichko qurbonlar soni besh nafarga, jarohatlanganlar esa 34 kishiga yetganini bildirgan. Oradan ko‘p o‘tmay mahalliy OAV yana uch kishining jasadi topilgani haqida xabar berdi.

Shu tariqa, halok bo‘lganlar soni sakkiz nafarga yetdi. Ukraina Favqulodda vaziyatlar davlat xizmati ma’lumotiga ko‘ra, hujum natijasida Kiyevning bir nechta tumanlaridagi turar joylar va fuqarolik infratuzilmasiga jiddiy zarar yetgan. Eng katta vayronagarchilik Darnitskiy tumanida kuzatilgan. Bu yerda ko‘p qavatli turar joy binolari qisman qulagan, 16 qavatli uy va bir nechta xususiy hovlilar ham shikastlangan.

Shuningdek, Shevchenkivskiy tumanida turar joy binolari, mehmonxona va noturar obyektlarda yong‘inlar yuzaga kelgan. Goloseyevskiy, Pecherskiy, Obolonskiy, Svyatoshinskiy hamda Desnyanskiy tumanlarida ham turar joy binolari va omborxonalarga zarar yetgani ma’lum qilindi. Qutqaruv xizmatlari vayronalar ostida qidiruv-qutqaruv ishlarini davom ettirmoqda. Rasmiylar qurbonlar va jabrlanganlar soni yana ortishi mumkinligini istisno etmayapti.