2022-yilda 107 ming gektar maydonda saksovul va boshqa choʻl oʻsimliklaridan “yashil qoplamalar” barpo etilgan.

Bu haqda AOKAda oʻtkazilgan brifingda Oʻrmon xoʻjaligi agentligi axborot xizmati rahbari Otabek Ashurov maʼlum qildi.

Qayd etilishicha, jami 590,3 tonna, shundan 391 tonna mahalliy aholi tomonidan choʻl oʻsimliklarining urugʻlari jamgʻarildi, 100 gektar saksovul va boshqa choʻl oʻsimliklaridan niholxonalar tashkil etilgan.

635 nafar ishchi-xodimlar, 250 dona yuqori unumli traktorlar va 2 dona kichik aviatsiya (AN-2) jalb etilgan.

Maʼlum qilinishicha, joriy yilda 100 ming gektar maydonda “yashil qoplamalar” himoya oʻrmonzorlari barpo etiladi.

Ularni barpo etish va xatosini toʻldirish uchun jami 420 tonna saksovul, qandim, qoraburoq kabi choʻl oʻsimliklarining urugʻlarini jamgʻariladi.

Joriy yilda Orol dengizining suvi qurigan tubida “yashil qoplamalar” barpo etish uchun jami 25 mlrd. soʻm mablagʻlar talab etiladi.

Moliyalashtirish manbalari boʻyicha Ekologiya, atrof muhitni muhofaza qilish va chiqindilar bilan bogʻliq ishlarni amalga oshirish jamgʻarmasidan 5 mlrd. soʻm, Oʻrmon xoʻjaligini rivojlantirish jamgʻarmasidan 5 mlrd. soʻm, Aksiyadorlik tijorat banklaridan 5 mlrd. soʻm, Qoraqalpogʻiston Respublikasi respublika byudjetining oshirib bajarilgan qismi hisobidan 10 mlrd. soʻm ajratiladi.

Bundan tashqari, oʻtgan yillardagi mavjud qarzdorliklar uchun Vazirlar Mahkamasining zaxira jamgʻarmasidan 5,5 mlrd. soʻm maqsadli mablagʻlarni ajratilishi koʻzda tutilmoqda.

Shuningdek, Orolboʻyi mintaqasi boʻlgan Navoiy viloyatida 50 ming gektar, Buxoro viloyatida 40 ming gektar hamda Xorazm viloyatida 11 ming gektar maydonda “yashil qoplamalar” barpo etildi.

• Orol dengizi
• O‘rmon xo‘jaligi
• Qoraqalpog‘iston