Yevropa Ittifoqi mamlakatlari 25-oktabrga o‘tar kechasi qishki vaqtga o‘tdi. Shu munosabat bilan soat millari bir soat orqaga surildi. Bu haqda “Deutsche Welle” xabar berdi.

Qayd etilishicha, Bryusselda 25-oktabrga o‘tar kechasi soat 03:00 da vaqt 02:00 ga o‘zgartirilgan. Mazkur tartib Yevropa Ittifoqi mamlakatlarida yozgi va qishki vaqtga o‘tish bo‘yicha yagona qoidalar asosida amalga oshiriladi.

Yevropa Ittifoqida vaqtni mavsumiy o‘zgartirish tartibi 1996-yildan beri amal qiladi. Unga ko‘ra, mart oyining oxirgi yakshanbasida soat millari bir soat oldinga, oktabr oyining oxirgi yakshanbasida esa bir soat orqaga suriladi.

2019-yilda Yevroparlament soat millarini mavsumiy o‘zgartirish amaliyotidan voz kechishni qo‘llab-quvvatlagan. Biroq Yevropa Ittifoqi mamlakatlari bu masalada hozirgacha yagona qarorga kelmagan.

Yevropa Ittifoqi hududida uchta vaqt mintaqasi mavjud. Irlandiya va Portugaliyada Grinvich vaqti, Finlyandiya va Boltiqbo‘yi mamlakatlari kabi sakkizta davlatda Sharqiy Yevropa vaqti, Germaniya va boshqa a’zo mamlakatlarda esa Markaziy Yevropa vaqti amal qiladi.