Milliarder Ilon Mask AQSHda Respublikachilar partiyasini qo‘llab-quvvatlash uchun 446 million dollar ajratib, mamlakatdagi eng yirik yakka siyosiy donorga aylandi. Bu haqda saylov kampaniyalarini moliyalashtirish hisobotlarini o‘rgangan The Washington Post nashri xabar berdi.

Nashr ma’lumotlariga ko‘ra, Maskning mablag‘lari 3-noyabr kuni bo‘lib o‘tadigan Kongress saylovlarida respublikachilarning Kongressdagi ko‘pchilik o‘rnini saqlab qolishiga yordam berishga qaratilgan. AQSHdagi yirik siyosiy homiylar saylov kampaniyalari uchun jami 2,7 milliard dollardan ortiq mablag‘ ajratgan. Shundan 1,7 milliard dollari respublikachilarni, 832 million dollari demokratlarni qo‘llab-quvvatlashga yo‘naltirilgan. Yana 264 million dollar har ikki partiyani qo‘llab-quvvatlovchi va muayyan manfaatlarni ilgari suruvchi guruhlarga to‘g‘ri keladi.

Respublikachilarning boshqa yirik homiylari orasida Uline kompaniyasi egalari Elizabet va Richard Yulay 150 million dollar, One Nation notijorat tashkiloti 133 million dollar hamda Susquehanna International Group hammuassisi Jeff Yass 110 million dollar ajratgan.

Demokratlarning eng yirik homiylari orasida milliarder Jorj Soros va Majority Forward notijorat tashkiloti bor. Ularning har biri 102 million dollardan mablag‘ ajratgan. House Majority Forward tashkiloti 94 million dollar, Nyu-Yorkning sobiq meri Maykl Blumberg esa 84 million dollar xayriya qilgan.

Mablag‘larning asosiy qismi Super PAC deb ataladigan siyosiy qo‘mitalarga yo‘naltirilgan. AQSH qonunchiligiga ko‘ra, bunday qo‘mitalar siyosiy nomzodlar va kampaniyalarni qo‘llab-quvvatlash uchun homiylardan cheklanmagan miqdorda mablag‘ qabul qilishi mumkin.

Nashr, shuningdek, dunyoning eng boy insonlaridan biri Jeff Bezosning siyosiy xayriyalariga e’tibor qaratgan. Ma’lumotlarga ko‘ra, Bezos joriy saylov davrida 15 ming dollar ajratgan va bu mablag‘ uning Amazon hamda Blue Origin kompaniyalari bilan bog‘liq federal siyosiy qo‘mitalarga yo‘naltirilgan.

AQSHda Kongressga oraliq saylovlar 3-noyabr kuni bo‘lib o‘tadi. Saylovlarda Vakillar palatasining barcha 435 a’zosi hamda Senatning 35 a’zosi saylanadi.