Havo haroratining pasayishi va isitish mavsumining boshlanishi munosabati bilan gaz uskunalaridan xavfsiz foydalanish yuzasidan fuqarolarga ogohlantirish berildi. Iste’molchilardan isitish moslamalarining texnik holatiga e’tibor qaratish va is gazidan zaharlanish xavfining oldini olish so‘raldi. Bu haqda Energetika vazirligining rasmiy Telegram kanalida ma’lum qilindi.

Qayd etilishicha, qo‘lbola va nostandart isitish qurilmalaridan foydalanish, gaz uskunalarini malakasiz mutaxassislarga o‘rnattirish, dudburonlarning noto‘g‘ri ulanishi hamda shamollatish kanallarining nosozligi inson hayoti va salomatligi uchun xavf tug‘dirishi mumkin. Himoya tizimlaridagi nosozliklar ham baxtsiz hodisalarga sabab bo‘lishi ehtimoli bor.

Mutaxassislar gaz uskunalarini faqat malakali mutaxassislarga o‘rnattirish va tekshirtirish, dudburon hamda mo‘rkonlarni muntazam tozalash, shamollatish kanallarini berkitmaslikni tavsiya etmoqda. Shuningdek, gaz plitasidan xonalarni isitish maqsadida foydalanmaslik, isitish moslamalarini nazoratsiz qoldirmaslik va nosozlik aniqlanganda tegishli xizmatlarga murojaat qilish zarurligi ta’kidlandi.

Is gazidan zaharlanishning dastlabki belgilari bosh og‘rig‘i, bosh aylanishi, ko‘ngil aynishi va holsizlikdan iborat bo‘lishi mumkin. Bunday alomatlar kuzatilganda darhol toza havoga chiqish, boshqa odamlarni ham xavfli hududdan olib chiqish va tez tibbiy yordamga murojaat qilish lozim.

Rasmiy ogohlantirishda isitish mavsumida xavfsizlik qoidalariga rioya qilish, gaz uskunalari va isitish tizimlarini soz holatda saqlash baxtsiz hodisalarning oldini olishda muhim ekani qayd etildi.