Hukumat qarori bilan Vazirlar Mahkamasining “Qishloq xo‘jaligiga mo‘ljallangan yer uchastkalarini ijaraga berish tartibiga doir normativ-huquqiy hujjatlarni tasdiqlash to‘g‘risida” 2021-yil 24-noyabrdagi qaroriga o‘zgartirish va qo‘shimchalar kiritildi. Bu haqda Adliya vazirligi xabar bermoqda.

Qarorga quyidagi o‘zgartirish va qo‘shimchalarni kiritish belgilandi:

– qishloq xo‘jaligiga mo‘ljallangan yer uchastkasi ijarachisining o‘zida qoladigan va qayta ijaraga oluvchiga o‘tkaziladigan yer uchastkalarining maydoni Yer kodeksi 46 prim 1-moddasida belgilangan o‘lchamlardan kam bo‘lmasligi; 

– yer uchastkasini qisman qayta ijaraga berishda ularni ijarachi va qayta ijaraga oluvchi o‘rtasida taqsimlash qishloq xo‘jaligi xaritasidagi konturlar yaxlitligi va amaldagi sug‘orish tizimini saqlab qolgan holda alohida turgan konturlarni qayta taqsimlash orqali amalga oshirilishi;

– yer uchastkasini qisman qayta ijaraga berishda taraflar qishloq xo‘jaligiga mo‘ljallangan yer uchastkasini bo‘lish va uning yangi chegaralarini belgilash bo‘yicha davlat xizmatlaridan foydalanishi. 

2025-yil 1-noyabr holatida respublika bo‘yicha soliq organlarida 624 mingga yaqin ijara shartnoma hisobga qo‘yilgan bo‘lib, ular bo‘yicha 957,6 milliard so‘m soliq hisoblangan. Bunda ijaraga berilgan ko‘chmas mulk obyektlari soni 326 ming 746 tani tashkil etgan. Ularning 55 mingdan ortig‘i yuridik shaxslar, 271 mingdan ko‘prog‘i esa jismoniy shaxslar tomonidan olingan. Jismoniy shaxslar o‘rtasida tuzilgan shartnomalar soni 2024-yilning mos davriga nisbatan 11,1 foizga o‘sgan bo‘lib, ular asosida 732,6 milliard so‘m daromad solig‘i hisoblangan. Bu ko‘rsatkich ham o‘tgan yilga qaraganda 50,8 foizga yuqoridir.

• Adliya
• Yangilik
• Yer