Qashqadaryo va Jizzax viloyatlaridagi shu kungacha rasman nomlanmagan ikki tog‘ cho‘qqisiga yangi nom berildi. Bu haqda Vazirlar Mahkamasining tegishli qarori asosida ma’lum qilindi.

Qashqadaryo viloyatidagi Hisor davlat qo‘riqxonasining G‘elon bo‘limida joylashgan, xalq orasida “nomsiz cho‘qqi” deb atalib kelgan balandlikka “Muzqoya” nomi berildi.

Hisor davlat qo‘riqxonasi boshlig‘i Qahramon Normurodovning aytishicha, ushbu cho‘qqiga yillar davomida turli nomlar taklif qilingan, biroq u rasman nomlanmagan. Cho‘qqining atrofi yil davomida muz bilan qoplanganligi sababli unga “Muzqoya” nomi berilgan.

81 ming gektardan ortiq hududni egallagan Hisor davlat qo‘riqxonasida balandligi 2500 metrdan 4387 metrgacha bo‘lgan o‘nlab cho‘qqilar mavjud. Yangi nomlangan cho‘qqining balandligi esa 4360 metrni tashkil etadi.

Qo‘riqxona ma’muriyati hududdagi tabiiy obyektlarni inventarizatsiyadan o‘tkazib, Vazirlar Mahkamasiga jami 38 ta tabiiy obyektga nom berish bo‘yicha taklif kiritgan.

Shuningdek, Jizzax viloyatining Baxmal tumanida, Turkiston tog‘ tizmasining G‘o‘ralashsoy va Ko‘lsuv soylari oralig‘ida joylashgan nomsiz cho‘qqiga “Qirqqiz” nomi berildi.

Ma’lumot uchun, 2026-yil 9-iyulda Vazirlar Mahkamasining mamlakatdagi ayrim tog‘ tizmalari, tog‘lar, cho‘qqilar, daralar, dovonlar va g‘orlarning nomlarini tartibga solishga oid qarori qabul qilingan.

Mazkur qaror bilan O‘zbekiston bo‘yicha jami 124 ta geografik obyektning nomlarini tartibga solish va ularga yangi nom berish belgilangan.