Qirg‘izistonning sobiq ichki ishlar vaziri, siyosatchi Omurbek Suvonaliyev mamlakatda 2027 yilda bo‘lib o‘tadigan prezidentlik saylovida nomzod sifatida qatnashish niyati borligini bildirdi. Bu haqda u “Azattik” radiosiga bergan intervyusida ma’lum qildi.

66 yoshli Omurbek Suvonaliyev o‘zini ko‘p yillardan beri siyosat bilan shug‘ullanib kelayotgan shaxs sifatida saylovda amaldagi prezidentga raqobat qila oladigan nomzod deb hisoblashini aytgan. U shu maqsadda muxolifat kuchlarini birlashtirishga harakat qilishini ham ta’kidlab, siyosiy maydon so‘nggi yillarda ancha qisqargani, ayrim siyosatchilarning hibsga olingani yoki faoliyati cheklanganiga e’tibor qaratdi.

Qirg‘iziston Jogorku Keneshi navbatdagi prezidentlik saylovini 2027 yil 27 yanvarda o‘tkazish haqida qaror qabul qilgan. Ma’lumot uchun, Omurbek Suvonaliyev avval ichki ishlar vaziri, viloyat rahbari va Xavfsizlik kengashi kotibi o‘rinbosari lavozimlarida ishlagan bo‘lib, 2011 yilda ham prezidentlik saylovida o‘zini o‘zi nomzod sifatida ko‘rsatgan edi. Amaldagi prezident Sadir Japarov esa saylovda yana nomzodini qo‘yishini bildirib, barcha nomzodlar uchun teng sharoit yaratishga va’da bergan.