Misr sudi teleboshlovchi Sara Halifa va jinoyat ishi bo‘yicha yana 11 nafar ayblanuvchini giyohvandlik vositalarini ishlab chiqarish hamda sotishda aybdor deb topib, o‘lim jazosiga hukm qildi. Bu haqda “Al-Ahram” xabar berdi.

Sud ma’lumotlariga ko‘ra, ayblanuvchilar giyohvand moddalarni tayyorlash uchun xomashyo xarid qilish va tayyor mahsulotni sotish bilan shug‘ullangan uyushgan jinoiy guruh tuzgan. Ularga noqonuniy ravishda o‘qotar qurol saqlash ayblovi ham qo‘yilgan.

Tergov davomida huquq-tartibot idoralari 750 kilogrammdan ortiq giyohvandlik vositalari va ularni ishlab chiqarish uchun mo‘ljallangan xomashyoni musodara qilgan. Shuningdek, narkolaboratoriya sifatida jihozlangan ikkita xonadon hamda o‘q-dorilar saqlangan litsenziyasiz qurol-aslaha ombori aniqlangan.

Sara Halifa 2025-yil aprel oyida Qohirada hibsga olingan. U bir nechta telekanallarda boshlovchi sifatida faoliyat yuritgan va Misrda taniqli media shaxslaridan biri bo‘lgan.

Halifa va boshqa sudlanuvchilar sud hukmi ustidan shikoyat qilish huquqiga ega.