Qirg‘iziston va O‘zbekiston chegarasida yer osti tunnel topildi

Qirg‘izistonning Botken viloyatida O‘zbekiston bilan chegaradosh hududda kontrabanda maqsadida foydalanilgan bo‘lishi mumkin bo‘lgan yashirin tunnel aniqlandi.

Qadamjoy tumani Chechelik qishlog‘idagi tashlandiq uydan topilgan tunnelning chuqurligi taxminan 12 metr, kengligi esa 1,5 metrni tashkil etadi. Dastlabki ma’lumotlarga ko‘ra, yer osti yo‘li O‘zbekiston hududi tomonga yo‘naltirilgan.

Ma’lum qilinishicha, tunnel chegaradan tovarlarni noqonuniy olib o‘tishda foydalanish uchun qurilgani gumon qilinmoqda. Holat bo‘yicha tezkor ma’lumot asosida o‘tkazilgan tekshiruv davomida yer osti yo‘li aniqlangan.

Ayni paytda Botken viloyati Ichki ishlar boshqarmasi tergov xizmati tomonidan holat yuzasidan surishtiruv va tergov harakatlari olib borilmoqda.