Raqobatni rivojlantirish va iste’molchilar huquqlarini himoya qilish qo‘mitasi umumiy ovqatlanish korxonalarini Ramazon oyida mijozlarni “setlar” (kompleks ovqatlar to‘plami) xarid qilishga majburlamaslikka chaqirdi.

Qo‘mita ma’lum qilishicha, ayrim kafe, restoran va oshxonalarda Ramazon davrida “aksiya setlar” joriy qilinib, ularni majburiy tarzda taklif qilish, shuningdek, minimal narx belgilab, boshqa tanlovni cheklash holatlari kuzatilmoqda. Bu esa iste’molchilarning erkin tanlov huquqlarini cheklash alomatlarini ko‘rsatadi.

“Iste’molchilarning huquqlarini himoya qilish to‘g‘risida”gi qonunning 4-moddasiga muvofiq, iste’molchi tovar va xizmatlarni erkin tanlash hamda ularning sifatli bo‘lishini talab qilish huquqiga ega. 21-moddaga ko‘ra esa sotuvchi yoki ijrochi iste’molchini qo‘shimcha tovarlar xarid qilishga yoki xizmatlardan foydalanishga majburlay olmaydi.

Qo‘mita umumiy ovqatlanish korxonalari xizmat ko‘rsatish jarayonida mijozlarni qo‘shimcha mahsulot va xizmatlarni olishga qistamasligi, “set”dan bosh tortgan taqdirda taomnomadagi boshqa taomlarni buyurtma qilish huquqini cheklamasligi lozimligini ta’kidladi.

Shuningdek, iste’molchilar sog‘lig‘iga salbiy ta’sir ko‘rsatishi mumkin bo‘lgan, jumladan allergiya chaqiruvchi tarkibiy qismlar inobatga olinmasdan, taomlarni ovqatlar to‘plami tarkibida majburiy sotish holatlariga yo‘l qo‘ymaslik kerakligi eslatildi.

Raqobat qo‘mitasi bu kabi holatlar iste’molchilar huquqlarini buzishi mumkinligini ta’kidlab, qonun talablari buzilgan taqdirda belgilangan tartibda ta’sir choralari ko‘rilishini eslatdi.

• Ogohlantirish
• Qo‘mita
• Ramazon
• korxona va tashkilotlar
• raqobat