“Bavariya” va Senegal terma jamoasi hujumchisi Sadio Mane Avstriyaning Insbruk shahrida muvaffaqiyatli operatsiya qilindi. Bu haqda Myunxen klubining rasmiy sayti maʼlum qildi.

Operatsiyani 17-noyabr payshanba kuni professor Kristian Fink va doktor Endi Uilyams amalga oshirgan.

Futbolchi oʻng fibula boshiga tendon biriktirilgan. Yaqin orada Mane Myunxenda reabilitatsiyani boshlashi kerak.

Klubning taʼkidlashicha, Sadio yaqin kunlarda Qatarda boshlanadigan jahon chempionatida Senegal terma jamoasi safida oʻynay olmaydi.

U 8-noyabr kuni Bundesliga doirasidagi “Bavariya” 6:1 hisobida gʻalaba qozongan “Verder”ga qarshi oʻyinda ishtirok etgan edi.

Avvalroq, Senegal terma jamoasi Mane jarohatiga qaramay, jamoaga faqat guruh bosqichi oʻyinlarida yordam bera olmasligi, pley-off bosqichiga chiqsa, maydonga tushishni uddasidan chiqishiga umid qilgan holda, uni JCh-2022 uchun qaydnomaga kiritgan edi.

• Futbol
• Jahon chempionati
• Mane