Kecha, 4 iyul kuni Rossiya Prezidenti Vladimir Putin va AQSH Prezidenti Donald Tramp telefon orqali muloqot qildi. Kreml ma’lumotiga ko‘ra, suhbat 1 soat 25 daqiqa davom etgan. Qayd etilishicha, muloqot davomida Ukrainadagi vaziyat, Eron atrofidagi holat hamda Rossiya–AQSH munosabatlarining istiqbollari muhokama qilingan. Shuningdek, tomonlar yaqin vaqtda yana telefon orqali muloqot qilishga tayyor ekanini bildirgan. Kreml yordamchisi Yuriy Ushakovning ma’lum qilishicha, qo‘ng‘iroq tashabbusi Vashington tomonidan bildirilgan. Uning aytishicha, Donald Tramp Ukrainadagi harbiy harakatlarni tezroq to‘xtatish va mojaroni diplomatik yo‘l bilan hal etish bo‘yicha sa’y-harakatlarni qo‘llab-quvvatlashini yana bir bor ta’kidlagan. Rossiya tomoni esa mojaroni siyosiy-diplomatik yo‘l bilan hal qilish tarafdori ekanini, bunda o‘zining prinsipial yondashuvlari hisobga olinishi lozimligini bildirgan. Shuningdek, suhbat chog‘ida ikki davlat o‘rtasidagi iqtisodiy va harbiy-siyosiy aloqalarni rivojlantirish istiqbollari ham muhokama qilingan. Kreml bayonotiga ko‘ra, muloqot konstruktiv va amaliy ruhda o‘tgan.