Qozog‘iston Energetika vazirligi benzin, dizel yoqilg‘isi hamda qator neft mahsulotlari eksportiga qo‘yilgan cheklovni yana olti oyga uzaytirishni taklif qildi. Loyihaga ko‘ra, Yevrosiyo iqtisodiy ittifoqi davlatlari uchun taqiq 2026 yil 22 noyabrdan 2027 yil 22 maygacha, ittifoqqa kirmaydigan mamlakatlar uchun esa 2027 yil 1 yanvardan 30 iyungacha amal qiladi.

Cheklov benzin va dizeldan tashqari aviakerosin, gazoyl, yengil distillyatlar, bitum, toluol hamda ksilolni ham qamrab oladi. Shu bilan birga, gumanitar yuklar va hukumat qarorlari asosida amalga oshiriladigan maxsus yetkazib berishlar ushbu taqiqdan mustasno bo‘ladi. Eslatib o‘tamiz, avvalroq Qozog‘iston rasmiylari Rossiyadan benzin yetkazib berish bo‘yicha rasmiy so‘rov kelib tushmaganini ma’lum qilib, bu boradagi xabarlarni rad etgan edi.