Bugun, 4 iyul kuni Marokash milliy terma jamoasi 2026 yilgi Jahon chempionati nimchorak finalida Kanadani 3:0 hisobida mag‘lub etib, chorak finalga yo‘l oldi. Xyuston shahridagi uchrashuvda Azzedin Unai 50 va 82-daqiqalarda dubl qayd etgan bo‘lsa, Sufyon Rahimi 90+8-daqiqada hisobni yirik ko‘rinishga olib keldi.

Shu tariqa, Marokash chorak finalda Fransiya bilan to‘qnash keladi. Fransuzlar nimchorak finalda Paragvayni 1:0 hisobida mag‘lub etgan edi. Ikki jamoa o‘rtasidagi bahs 9 iyul kuni bo‘lib o‘tadi. Uchrashuvning birinchi bo‘limida qiziqarli statistika qayd etildi: darvoza tomon aniq yo‘naltirilgan 5 ta zarbaga qarshi hakam 6 ta sariq kartochka ko‘rsatdi. Bu Jahon chempionatlari tarixida birinchi bo‘limda sariq kartochkalar soni aniq zarbalardan ko‘p bo‘lgan ilk holat sifatida qayd etildi. Ma’lumot uchun, Kanada ushbu mundialda o‘z tarixidagi eng yaxshi natijasini qayd etdi. Marokash esa ketma-ket ikkinchi mundialda ham pley-offda muvaffaqiyatli ishtirok etishda davom etmoqda.