O‘zbekistonda davlat tibbiyot muassasalarida kamida 15 yil ishlagan tibbiyot va farmatsevtika xodimlariga ipoteka asosida xarid qilinadigan uy-joyning boshlang‘ich badali uchun subsidiya ajratiladi. Mazkur tartib Vazirlar Mahkamasining 4-iyuldan kuchga kirgan qarori bilan tasdiqlandi. Unga ko‘ra, davlat tibbiyot muassasalarida uzoq yillar faoliyat yuritgan xodimlarning ipoteka asosida uy-joy sotib olishida dastlabki badalning bir qismi davlat tomonidan qoplab beriladi. Avvalroq Prezident qarori bilan ushbu toifadagi xodimlar uchun uy-joy boshlang‘ich to‘lovining 25 foizini qoplab berish belgilangan edi. Subsidiya olish uchun fuqarolar Davlat xizmatlari markazi yoki my.gov.uz portali orqali murojaat qilishi mumkin.

Ariza ko‘rib chiqilganda talabgorning ayni paytda davlat tibbiyot muassasasida ishlayotgani hamda kamida 15 yillik ish stajiga egaligi tekshiriladi. Shuningdek, subsidiya bir oilaga faqat bir marta (er yoki xotindan biriga) ajratiladi. Talabgor yashash joyidan qat’i nazar, dastur doirasida istalgan hududdagi birlamchi bozordan ipoteka krediti asosida uy-joy xarid qilishi mumkin. Quyidagi holatlarda subsidiya ajratish rad etiladi: arizada ko‘rsatilgan ma’lumotlar belgilangan mezonlarga mos kelmasa; noto‘g‘ri yoki soxta ma’lumotlar taqdim etilgan bo‘lsa.