Elektr energiyasi tariflari oshishi ortidan O‘zbekistonda quyosh panellariga qiziqish yanada kuchaydi. Mutaxassislar fikricha, to‘g‘ri tanlangan tizim elektr xarajatlarini sezilarli kamaytirishi va bir necha yil ichida sarflangan mablag‘ni qoplashi mumkin. Ma’lumotlarga ko‘ra, O‘zbekiston sharoitida 1 kVt quvvatli quyosh fotoelektr tizimi yiliga o‘rtacha 1350–1650 kVt/soat elektr energiyasi ishlab chiqaradi. Bozorda 1 kVt quvvatli on-grid (akkumulyatorsiz) tizimni o‘rnatish o‘rtacha 4–4,5 mln so‘m, gibrid yoki off-grid tizimlar esa 6–7 mln so‘m atrofida baholanmoqda. Eng ko‘p talab qilinadigan 5 kVt quvvatli tizim 4–6 kishilik oilaning kundalik ehtiyojini qoplay oladi.

Uning qiymati: On-grid — 20–25 mln so‘m; Gibrid — 30–35 mln so‘m. Elektr iste’moli yuqori bo‘lgan xonadonlar uchun mo‘ljallangan 10 kVt quvvatli tizimlar esa: On-grid — 40–45 mln so‘m; Gibrid — 60–70 mln so‘m, yuqori sifatli akkumulyatorlar bilan esa 85–90 mln so‘mgacha yetishi mumkin. Mutaxassislar ta’kidlashicha, elektr iste’moli yuqori bo‘lgan xonadonlarda quyosh panellari sarflangan investitsiyani bir necha yil ichida qoplab, keyingi yillarda esa elektr xarajatlarini tejash hisobiga iqtisodiy samara beradi.