Joriy yilning aprel oyi holatiga ko‘ra, dunyodagi milliarderlar soni o‘tgan 12 oy davomida 13 foizga oshib, rekord daraja — 3302 nafarga yetdi. Bu haqda UBS bankining yillik hisobotida ma’lum qilindi. Hisobotga ko‘ra, bir yil ichida dunyo bo‘yicha 383 nafar yangi milliarder paydo bo‘lgan. Shu bilan birga, ularning umumiy boyligi 25 foizga oshgan. Mamlakatlar kesimida eng katta o‘sish Janubiy Koreyada qayd etildi.

Bu yerda milliarderlar soni 31 nafardan 52 nafarga yetgan, ularning umumiy boyligi esa 139 foizga oshgan. Chilida milliarderlar soni o‘zgarmagan bo‘lsa-da, boyliklari 80 foizga ko‘paygan. Chexiyada esa ikki nafar yangi milliarder paydo bo‘lib, umumiy boylik 60 foizga o‘sgan. Eng ko‘p milliarderlar AQSHda yashaydi — ularning soni 1000 nafardan oshgan. Keyingi o‘rinlarda Xitoy (562 nafar), Hindiston (211 nafar), Germaniya (193 nafar) va Rossiya (122 nafar) joylashgan. Hisobotda qayd etilishicha, 3302 nafar milliarderning aksariyatining boyligi 50 milliard dollardan kam. 18 nafarning boyligi 50–100 milliard dollar oralig‘ida bo‘lsa, 19 nafarning aktivlari 100 milliard dollardan oshib ketgan.