Deputat Kusherbayevga ko‘ra, Yunusobod tumanida fuqarolar tomonidan tadbirkorlik faoliyati uchun qurilgan qurilmalarni buzish ishlari noqonuniy amalga oshirilgan.

U o‘z fikrini asoslar ekan, Vazirlar Mahkamasining 2017 yil 5 iyuldagi 467-son qarori bilan tasdiqlangan nizomda keltirilgan tartibni eslatib o‘tadi.

Unga ko‘ra esa o‘zboshimchalik bilan qurilgan imoratlarni aniqlash hamda ularni buzib tashlashni tashkil etish sohasidagi vakolatli davlat organlariga hokimiyat, kadastr, arxitektura, ekologiya va madaniy meros departamenti kiradi.

“Bu yerda prokuraturaga ham, ichki ishlar organlariga ham o‘zboshimcha qurilmani buzdirish vakolati berilmagan”, – deb yozadi Kusherbayev.

Shuningdek, o‘zboshimcha qurilma aniqlangan taqdirda nizomga ko‘ra, qurilmani o‘n besh kunlik muddatda ixtiyoriy buzib tashlash to‘g‘risida dalolatnoma tuzilib, qurilma egasi ogohlantirilishi shart.

Agar ushbu muddatda fuqaro bu qurilmaga nisbatan mulk huquqini e’tirof etish to‘g‘risida sudga da’vo bersa, da’vo berilgan kundan boshlab sudning yakuniy qarori qabul qilinishiga qadar ushbu imoratni buzish to‘xtatib turiladi.

O‘zboshimcha qurilmani buzib tashlash uchun belgilangan muddat tugaganidan so‘ng vakolatli organ ikki ish kunida bu to‘g‘risida tuman (shahar) hokimligi huzuridagi Yer uchastkalarini berish masalalarini ko‘rib chiquvchi komissiyaga xabarnoma kiritadi.

Komissiya uch ish kuni mobaynida tartibga asosan, o‘zboshimcha qurilmani buzib tashlash to‘g‘risidagi tuman (shahar) hokimining da’vo arizasini sudga kiritadi.

“Toki sudning yakuniy qarori chiqmagunga qadar hech bir organ yoki shaxs fuqarolarning qurilmalarini o‘zboshimcha deb, shikast yetkazishi, buzishi va bosim o‘tkazishi mumkin emas!

Yunusobod tumanida sodir bo‘lgan holatda prokuratura va ichki ishlar organlari mas’ul xodimlari mansab vakolatidan chetga chiqib, fuqarolarning huquqlari ko‘pol darajada buzilishiga yo‘l qo‘yishgan. Bu jinoiy javobgarlika sabab bo‘lishi mumkin.

Shu munosabat bilan, Bosh prokuratura va Ichki ishlar vazirligi o‘z tizimining quyi bo‘g‘inida sodir etilayotgan ushbu qonunbuzilishi holatiga huquqiy baho berib, qonuniy choralar ko‘rishi shart, deb hisoblaymiz”, – deydi deputat.

Rasul Kusherbayev, shuningdek, O‘zbekiston ayni paytda “Hukumat sud qarorisiz va adolatli tovon pulisiz mulkni musodara qilmaslik” reytingida 139 ta davlat ichida 138-o‘rinda turganligini eslatib o‘tmoqda.

Eslatib o‘tamiz, Xabardor.uz bir muddat oldin mazkur masalani o‘rganishni boshlagan va ayrim ma’lumotlarni ochiqlagan edi.

• Deputat
• Snos
• Toshkent