2026-yil 1-oktyabrdan Toshkent shahrida avtobus va metroda elektron to‘lov orqali bir martalik yo‘l haqi 1 700 so‘mdan 2 500 so‘mga oshiriladi. Naqd to‘lovda yo‘l haqi 3 000 so‘m bo‘lib qoladi. Bu haqda Xalq deputatlari Toshkent shahar Kengashining tegishli qarorida belgilangan.

Yangi tarifga ko‘ra, elektron to‘lov orqali amalga oshiriladigan bir martalik qatnov narxi qariyb 47 foizga oshadi. Transport kartasidan foydalanuvchilar uchun bir soat ichida boshqa yo‘nalishga o‘tishda imtiyozli tariflar saqlanib qoladi. Jumladan, avtobusdan keyin bir soat ichida boshqa avtobusga o‘tilsa, ikkinchi qatnov uchun 1 500 so‘m to‘lanadi. Uchinchi va undan keyingi avtobuslarda esa ushbu vaqt oralig‘ida yo‘l haqi olinmaydi.

Avtobus va metrodan birgalikda foydalanilganda ham imtiyozli tarif amal qiladi. Bunda birinchi qatnov uchun 2 500 so‘m, keyingi transport almashinuvida esa 1 500 so‘mdan to‘lanadi. Metrodagi imtiyoz bir soat ichida bir marta qo‘llanadi. Metroga ikkinchi marta kirilganda 60 daqiqalik hisob qaytadan boshlanadi.

Transport kartalari uchun ham yangi tariflar belgilanadi. Faqat avtobusdan foydalanish uchun kunlik tarif 11 500 so‘m, 30 kunlik tarif 250 ming so‘mni tashkil etadi. Avtobus va metrodan birgalikda foydalanish uchun kunlik tarif 13 500 so‘m, 30 kunlik tarif esa 345 ming so‘m etib belgilangan. Shuningdek, 10, 20 va 30 martalik safar paketlari mos ravishda 19 ming, 38 ming 500 va 57 ming 500 so‘mdan sotiladi. O‘quvchilar, talabalar, nafaqaxo‘rlar hamda nogironligi bo‘lgan shaxslar uchun transport kartalari tarif rejalarini xarid qilishda 50 foiz chegirma qo‘llanadi.