O‘zbekistonda elektr energiyasi va tabiiy gazdan intizomli foydalanib kelayotgan korxonalar uchun “namunali iste’molchi” maqomi joriy etildi. Endilikda ushbu maqomga ega tadbirkorlar elektr energiyasi va tabiiy gaz uchun 100 foiz emas, hisobot oyi qiymatining 15 foizini oldindan to‘laydi.

Prezidentning PF-202-son farmoniga ko‘ra, tegishli hisoblash tizimlariga — elektr energiyasi bo‘yicha EHNAT (ASKUE), tabiiy gaz bo‘yicha TGNHAT (ASKUG)ga ulangan, masofadan boshqarish imkoniyatiga ega hisobga olish uskunalari mavjud, muddati o‘tgan qarzdorligi va qoidabuzarliklari bo‘lmagan tadbirkorlik subyektlariga ushbu tartib tatbiq etiladi.

Qolgan to‘lovlarni oy davomida iste’molchining ehtiyojidan kelib chiqib, qismlarga bo‘lib amalga oshirish mumkin. Bu tadbirkorlarning aylanma mablag‘larini bir vaqtning o‘zida katta miqdorda to‘lovga yo‘naltirib qo‘ymasdan, ularni ishlab chiqarish va boshqa zarur xarajatlarga sarflash imkonini beradi.

Mazkur tartib Prezident Shavkat Mirziyoyevning 2026-yil 18-avgust kuni tadbirkorlar bilan ochiq muloqotida bildirilgan takliflar asosida joriy etildi. Energetika vazirligi ma’lumotiga ko‘ra, yangi tartib to‘lov intizomiga rioya qilayotgan tadbirkorlar uchun qo‘shimcha qulaylik yaratadi. Shuningdek, farmon bilan qarzdorlik sabab elektr energiyasi yoki tabiiy gaz tarmog‘idan uzilgan iste’molchilarni qayta ulash uchun olinadigan qo‘shimcha to‘lov ham bekor qilindi.