Shahrisabz tumanidan oqib o‘tuvchi tez oqar kanalda fojiaviy yakun topishi mumkin bo‘lgan hodisa yuz berdi. Bir fuqaro o‘z ehtiyotsizligi oqibatida suvga tushib ketgan va kuchli oqim uni qariyb 100 metr masofaga oqizib ketgan.

Suv girdobida qolgan fuqaro qirg‘oq bo‘yidagi shox-shabbalarga ilinib qolgan va aynan shu holat uning hayotini saqlab qolish uchun so‘nggi imkoniyatga aylangan.

Yaqin atrofdagi “Zibiniso” bolalar oromgohida xizmat o‘tayotgan oddiy askar Sh. Boboyev esa suvda ilashib qolgan odamni payqab qoladi va soniyalarni boy bermay, zudlik bilan tuman Favqulodda vaziyatlar bo‘limining qutqaruv qismiga xabar beradi. Voqea joyiga yetib kelgan FVB qutqaruvchilari maxsus anjomlar yordamida tezkor harakat qilib, fuqaroni kanalning qarama-qarshi qirg‘og‘idan xavfsiz hududga olib o‘tgan.