Toshkent shahrining Bektemir tumanida voyaga yetmagan bola o‘yinchoq avtomobilda katta yo‘lga chiqib, harakatdagi transport vositalari orasida harakatlangan holat aniqlandi. Bu haqda poytaxt Yo‘l harakati xavfsizligi boshqarmasi ma’lum qildi.

Qayd etilishicha, 8-may kuni soat 12:30 atrofida Oltingtopgan ko‘chasida ota-ona nazoratsizligi oqibatida bola o‘yinchoq avtomobilda yo‘lning qatnov qismiga chiqib ketgan.

Holat yuzasidan Toshkent shahar IIBB YHXB xodimlari tomonidan bolaning otasi bilan profilaktik suhbat o‘tkazildi. Shuningdek, Ma’muriy javobgarlik to‘g‘risidagi kodeksning 47-moddasiga asosan — bolalarni tarbiyalash va ularga ta’lim berish bo‘yicha majburiyatlarni bajarmaganlik holati yuzasidan ma’muriy bayonnoma rasmiylashtirildi.