Ichki ishlar vazirligi ma’lum qilishicha, Toshkent shahrida ijaraga olingan uylarni qalbaki hujjatlar orqali sotish bilan shug‘ullangan jinoiy guruh fosh etildi.

Ma’lum bo‘lishicha, “Xavfsiz va sog‘lom yurt” profilaktik tadbirlari doirasida Call markazga kelib tushgan tezkor axborot asosida IIV Tezkor-qidiruv departamenti xodimlari tomonidan maxsus operatsiya o‘tkazilgan.

Aniqlanishicha, 1992-yilda tug‘ilgan shaxs avval firibgarlik, o‘g‘rilik va hujjatlarni qalbakilashtirish jinoyatlari uchun sudlangan bo‘lishiga qaramay, yana to‘rt nafar shaxsni jinoiy faoliyatga jalb qilgan. 1980, 1997, 1994 va 2000-yillarda tug‘ilgan guruh a’zolari poytaxtdagi fuqarolarga tegishli uylarni ijaraga olib, egalarining xabarisiz hujjatlarni soxtalashtirib, ularni sotishga uringan.

Tezkor tadbir davomida ular Mirobod tumani Nukus ko‘chasida joylashgan, maydoni 95 kvadrat metr bo‘lgan xonadon uchun xaridor topgani aniqlangan. Narx har kvadrat metr uchun 1300 dollar qilib belgilangan va xaridor bilan og‘zaki kelishuvga erishilgan.

Shundan so‘ng Yakkasaroy tumanidagi notarial idorada oldi-sotdi hujjatlari rasmiylashtirilayotgan vaqtda, guruh a’zolari 110 ming dollarni olayotgan paytda ashyoviy dalillar bilan qo‘lga olingan.

Mazkur holat yuzasidan Jinoyat kodeksining 168-moddasi 4-qismi (firibgarlik) bilan jinoyat ishi qo‘zg‘atilib, gumonlanuvchilarga nisbatan qamoq ehtiyot chorasi qo‘llangan.

• Firibgarlik
• Soxta hujjat
• Toshkent
• Uy-joy