Favqulodda vaziyatlar vazirligi Toshkentdagi mehmonxonada sodir bo‘lgan yong‘in o‘chirilganini ma’lum qildi.

Qayd etilishicha, bugun, 16-oktyabr kuni soat 17:17 da Toshkent shahar Mirobod tumani Shahrisabz ko‘chasida joylashgan mehmonxonalar birining rekonstruksiya qilinayotgan binosini tom qismida yong‘in sodir bo‘layotganligi to‘g‘risida FVBga xabar tushgan.

Shunga ko‘ra, 14 ta yong‘in-qutqaruv ekipaji voqea joyiga soat 17:24 da yetib borib, yong‘in soat 18:19 da qurshab olingan va soat 19:16 da bartaraf etildi.

“Yong‘in natijasida tan jarohati olgan va vafot etgan fuqarolar to‘g‘risida xabar kelib tushmadi. Hodisa joyiga Favqulodda vaziyatlar vaziri general-mayor A.X.Qo‘ldoshev yetib borib, yong‘inni bartaraf etish jarayonini boshqarib bordi. Hozirda yong‘in sababi va keltirilgan moddiy zarar miqdori aniqlanmoqda”, - deyiladi xabarda.

• FVV
• Mehmonxona
• Toshkent