Prezident Shavkat Mirziyoyev raisligidagi videoselektor yig‘ilishida Sergeli tumanidagi ayrim maktablar quvvatidan 1,5–2 barobar ortiq yuklama bilan ishlayotgani qayd etildi. Shu bois o‘quvchi sig‘imini ikki barobar oshirish imkonini beradigan yangi tipdagi maktablar qurish taklif qilindi. Yangi loyihaga ko‘ra, sport zali, oshxona va ustaxonalar yerto‘lada, sinf xonalari esa yuqori qavatlarda joylashadi. Joriy yilda Toshkentning har bir tumanida bittadan maktab va bog‘chada ushbu tajriba yo‘lga qo‘yiladi.

Yig‘ilishda poytaxtda salqin mikroiqlim yaratish maqsadida 12 ta sun’iy ko‘l barpo etilishi, shundan 3 tasi Sergelining Qo‘shqo‘rg‘on, Sultonobod va Farog‘atli mahallalarida tashkil etilishi ma’lum qilindi. Shuningdek, “Jo‘n” kanali bo‘yida sayilgoh va salomatlik yo‘laklari barpo etilib, Chirchiq daryosi bo‘yida qo‘shimcha 300 gektar yashil hudud, piyodalar va velosiped yo‘laklari tashkil etiladi.