AQSh prezidenti Donald Tramp NATO sammitida ishtirok etish uchun Anqaraga mingga yaqin xavfsizlik va xizmat xodimlari, dunyodagi eng himoyalangan avtomobillardan biri — “The Beast” zirhli limuzini hamda maxsus ko‘chma hojatxonasi bilan tashrif buyurdi. Prezident delegatsiyasi tarkibida AQSh Maxfiy xizmati, diplomatik xavfsizlik xodimlari, Oq uy vakillari, harbiylar, razvedka va texnik mutaxassislar ham bor

. Tramp foydalanadigan “The Beast” zirhli limuzini ham Anqaraga yetkazilgan. Taxminan 9–10 tonna og‘irlikdagi ushbu avtomobil kuchli portlashlar, raketa hujumlari va boshqa xavf-xatarlarga qarshi himoya tizimlari bilan jihozlangan. Uning zirhli eshiklari qariyb 20 santimetr qalinlikda bo‘lib, samolyot eshiklari darajasidagi himoyani ta’minlaydi. Shuningdek, Tramp bilan birga olib kelingan maxsus ko‘chma hojatxona ham e’tibor markazida bo‘ldi.

AQSh rasmiylari xorijiy tashriflarda bunday amaliyotni xavfsizlik nuqtai nazaridan qo‘llaydi. Bunga sabab, prezidentning biologik namunalaridan uning salomatligi haqida ma’lumot olinishi ehtimolining oldini olishdir. Bundan tashqari, Tramp Anqaraga qiymati 500 million dollarga baholanayotgan, Qatar tomonidan sovg‘a qilingan Boeing samolyotida yetib keldi. Mazkur havo kemasi zamonaviy aloqa va mudofaa tizimlari bilan jihozlangan bo‘lib, prezident uchun yotoqxona, yig‘ilish zallari hamda parvoz vaqtida davlat boshqaruvini davom ettirish imkonini beruvchi maxsus infratuzilmaga ega.