Fransiya prezidenti Emmanuel Makron NATO sammiti doirasida Turkiyada bo‘lib turibdi. U bugun, 8-iyul kuni Anqaradagi tongni yugurish mashg‘uloti bilan boshladi. Davlat rahbari poytaxtdagi Seğmenler bog‘ida yugurish davomida mahalliy aholi bilan ham salomlashdi.

Ma’lum qilinishicha, Makron ertalab xavfsizlik xodimlari hamrohligida Chankaya qarorgohi atrofida yugurgan. Turkiya OAVlari tarqatgan suratlarda u oddiy sport kiyimida mashq qilayotgani aks etgan.

Suratlarga ko‘ra, Fransiya prezidenti to‘q ko‘k rangdagi Le Coq Sportif sport futbolkasini kiygan. Mazkur brend Fransiya milliy olimpiya terma jamoasining rasmiy hamkori hisoblanadi. Futbolkaning chakana narxi modeliga qarab 50–90 yevro atrofida baholanadi.

Makronning oyog‘ida esa HOKA brendiga mansub yugurish krossovkasi bo‘lgani ko‘rinadi. Ushbu turdagi sport poyabzallari xalqaro bozorda odatda 150–190 yevro narxda sotiladi.

Shuningdek, prezident mashg‘ulot vaqtida quyosh ko‘zoynagi taqqan va GPS funksiyali sport soatidan foydalangani ko‘ringan. Biroq suratlardan uning aniq modeli yoki brendini tasdiqlashning imkoni bo‘lmagan.

Emmanuel Makronning yugurishga bo‘lgan qiziqishi avval ham jamoatchilik e’tiborini tortgan edi. Anqaradagi bu galgi mashg‘ulot ham ijtimoiy tarmoqlarda keng muhokama qilinmoqda. Ayrim foydalanuvchilar uning sodda sport uslubini e’tirof etgan bo‘lsa, boshqalar prezidentning kuchaytirilgan xavfsizlik ostida shahar ko‘chalarida yugurganiga e’tibor qaratgan.