O‘zbekistonda Ramazon hayiti bayrami munosabati bilan ichki sayohatga katta chegirmalar e’lon qilindi. Bu haqida Turizm va madaniy meros vazirligi xabar berdi.

Xususan, Uzbekistan Airways AJ tomonidan bayram munosabati bilan 2022-yil 2-maydan 4-maygacha amalga oshiriladigan mahalliy aviaqatnovlarning barcha tariflariga 50 foiz chegirma joriy qilingan.

Shuningdek, “O‘zbekiston temir yo‘llari” AJ tomonidan esa Ramazon hayiti bayrami arafasida yo‘lovchilarga yanada ko‘proq qulaylik yaratish maqsadida 3-, 4-, 5-may kunlari Samarqand–Toshkent–Samarqand yo‘nalishida 767/768-sonli yuqori tezlikda harakatlanuvchi “Afrosiyob” poyezdining qo‘shimcha qatnovi yo‘lga qo‘yiladi.

“Vaqf” xayriya jamoat fondi tasarrufidagi pullik kirish chiptalari joriy qilingan madaniy meros obyektlarida (ziyoratgoh va qadamjolar) 30-aprel–1-, 2-, 3-, 4-may sanalarida O‘zbekiston fuqarolari uchun kirish chiptalar narxiga kattalar uchun 20 foiz hamda yoshlar uchun 50 foiz chegirmalar joriy qilindi.

Bundan tashqari, respublika bo‘ylab joylashgan muzeylar, mehmonxonalar, ovqatlanish shoxobchalari tomonidan ixtiyoriy chegirmalar taqdim etilmoqda.

• O‘zbekiston temir yo‘llari
• Uzbekistan airways
• Vaqf