O‘zstandart agentligi tugatilib, uning funksiyalari Investitsiyalar va tashqi savdo vazirligi huzuridagi yangi, Texnik jihatdan tartibga solish agentligi nazoratiga o‘tmoqda. 

Bu haqda O‘zbekiston Respublikasi Prezidentining tegishli farmon va qarori imzolandi. 

Qarorga muvofiq, Texnik jihatdan tartibga solish agentligi bosh direktori Vazirlar Mahkamasi tomonidan investitsiyalar va tashqi savdo vazirining taqdimnomasiga asosan lavozimga tayinlanadi va lavozimidan ozod etiladi. 

Shu bilan birga, texnik jihatdan tartibga solish, standartlashtirish, sertifikatlash va metrologiya sohasidagi qonunchilik hujjatlari talablari buzilganligi uchun moliyaviy va ma’muriy jarimalar Texnik jihatdan tartibga solish agentligining maxsus jamg‘armasiga to‘liq o‘tkaziladi va ushbu mablag‘larning 50 foizdan kam bo‘lmagan qismi mahalliy korxonalar tomonidan xalqaro standartlarni xarid qilish va joriy etish bilan bog‘liq xarajatlarni qoplash uchun yo‘naltiriladi.

Farmonga ko‘ra, ayrim turdagi xavflilik darajasi yuqori bo‘lmagan mahsulotlarning muvofiqligini baholash muvofiqlikni deklaratsiyalash yo‘li bilan amalga oshiriladi.

Shuningdek, xavflilik darajasi yuqori bo‘lgan ayrim turdagi mahsulotlarni davlat ro‘yxatidan o‘tkazgandan so‘ng respublika hududiga erkin muomalaga chiqarish tartibi joriy etiladi.

Mahsulotning xorijiy davlatlarning standartlariga muvofiqligini baholash uchun xorijiy davlatlar standartlarining O‘zbekiston Respublikasida davlat ro‘yxatidan o‘tkazilishi talab qilinmaydi.