Fransiya Slovakiyaga qo‘shilib, kelib chiqishi o‘zbekistonlik bo‘lgan milliarder Alisher Usmonovni Yevropa Ittifoqi sanksiyalar ro‘yxatidan chiqarishni so‘ramoqda. Bu haqda muzokaralardan xabardor manbalarga tayanib, Euronews xabar berdi.

Slovakiya avvaldan Alisher Usmonov va milliarder Mixail Fridmanlarni Rossiyaning Ukrainaga qarshi urushi munosabati bilan joriy etilgan YEI sanksiyalaridan chiqarishni talab qilib kelgan. Endi Bratislavaning bu boradagi pozitsiyasini Parij ham qo‘llab-quvvatlamoqda.

Manbalarga ko‘ra, Fransiyaning mazkur pozitsiyasi boshqa YEI davlatlarida norozilik uyg‘otgan. Ayrim diplomatlar Parijning qarori ortida iqtisodiy manfaatlar bo‘lishi mumkinligini bildirmoqda.

Shu bilan birga, Fransiya Rossiyaga qarshi sanksiyalarning umumiy muddatini uzaytirishni qo‘llab-quvvatlashini bildirgan. Usmonovni sanksiyalar ro‘yxatidan chiqarish talabi esa Slovakiya bilan kelishuvga erishish uchun siyosiy murosa sifatida ilgari surilayotgani aytilmoqda.

Yevropa Ittifoqida sanksiyalarni uzaytirish uchun barcha 27 davlatning roziligi talab etiladi. Shu sababli birgina davlatning qarori ham jarayonni bloklashi mumkin.

YEI elchilari 14-sentabr kuni ushbu masalani yana muhokama qilishi, yakuniy kelishuv esa 15-sentabrgacha qabul qilinishi kutilmoqda.

Alisher Usmonov 2022-yil fevral oyida Rossiyaning Ukrainaga keng ko‘lamli bosqini boshlanganidan so‘ng YEI sanksiyalar ro‘yxatiga kiritilgan. Unga nisbatan aktivlarni muzlatish, YEI hududiga kirishni cheklash hamda mablag‘ va iqtisodiy resurslar taqdim etishni taqiqlash kabi choralar qo‘llangan.