Dunyoda 739 million nafar voyaga yetgan inson oddiy savodxonlik ko‘nikmalariga ega emas. Ularning qariyb uchdan ikki qismini ayollar tashkil etadi. Bu haqda YUNESKO ma’lum qildi.

Tashkilot 8-sentabr kuni Xalqaro savodxonlik kunining 60 yilligini nishonladi. YUNESKO savodxonlik insonning asosiy huquqlaridan biri ekanini ta’kidladi.

So‘nggi 50 yil davomida dunyoda savodxonlik darajasi sezilarli oshgan. Yoshlar o‘rtasidagi savodxonlik 1975-yildagi 75 foizdan 2024-yilda 93 foizga, kattalar o‘rtasidagi savodxonlik esa 65 foizdan 88 foizga yetgan.

Shunga qaramay, dunyoda 273 million bola maktabga bormaydi. Daromadi past va o‘rtacha bo‘lgan mamlakatlarda 10 yoshli bolalarning 70 foizi oddiy matnni o‘qish va tushunishda qiynaladi.

YUNESKO rahbari Holid an-Ananining ta’kidlashicha, bu raqamlar nafaqat boy berilgan imkoniyat va salohiyatni, balki insonning asosiy huquqlari poymol etilayotganini ham ko‘rsatadi.

Xalqaro savodxonlik kuni har yili 8-sentabrda nishonlanadi. Ushbu sana 1967-yildan buyon savodxonlikning adolatli, tinch va barqaror jamiyat qurishdagi ahamiyatini targ‘ib qilishga xizmat qilib kelmoqda.