Dunyoda har yili 727 mingga yaqin kishi o‘z joniga qasd qiladi. 15–29 yoshdagi yoshlar orasida suitsid 2021-yilda o‘lim sabablari bo‘yicha uchinchi o‘rinni egallagan. Bu haqda Birlashgan Millatlar Tashkiloti ma’lum qildi.

BMT ma’lumotlariga ko‘ra, suitsid xavfiga olib keluvchi omillar turlicha. Yuqori daromadli mamlakatlarda ular ko‘pincha depressiya, alkogolga qaramlik va avvalgi suitsidga urinishlar bilan bog‘liq.

Biroq ayrim holatlarda insonlar moliyaviy qiyinchiliklar, munosabatlarning buzilishi, kasallik, urush yoki tabiiy ofatlar kabi inqirozli vaziyatlarda impulsiv qarorlar qabul qilishi mumkin.

Qochqinlar, migrantlar, mahalliy tub aholi vakillari va mahkumlar kabi diskriminatsiya yoki ijtimoiy bosimga duch keluvchi guruhlar ham yuqori xavf ostidagi qatlamlar qatoriga kiradi.

Jahon sog‘liqni saqlash tashkiloti suitsidlarning oldini olish uchun xavfli vositalardan foydalanish imkoniyatini cheklash, mavzuni OAVda mas’uliyat bilan yoritish, yoshlarning emotsional va ijtimoiy ko‘nikmalarini rivojlantirish hamda suitsid xavfi mavjud shaxslarni o‘z vaqtida aniqlab, ularga yordam ko‘rsatishni tavsiya etadi.

Shuningdek, suitsidning oldini olish bo‘yicha samarali choralar sog‘liqni saqlash, ta’lim, mehnat, qishloq xo‘jaligi, adliya, biznes va media kabi sohalarning hamkorligini talab qiladi.

Ma’lumotlarga ko‘ra, hozirda 38 ta davlat suitsidning oldini olish bo‘yicha milliy strategiya ishlab chiqqan. Shu bilan birga, ko‘plab mamlakatlarda ishonchli statistik ma’lumotlarni shakllantirish tizimi yetarli darajada rivojlanmagan.

10-sentabr — Butunjahon suitsidning oldini olish kuni. Ushbu sana 2003-yildan buyon har yili nishonlanadi.