O‘zbekistonda ishlaydigan onalarga farzandi bir yoshga to‘lguniga qadar Ijtimoiy sug‘urta jamg‘armasidan nafaqa to‘lanadi.

Bu haqda Prezident Shavkat Mirziyoyev 3-sentabr kuni kambag‘allikni qisqartirish va aholi daromadlarini oshirish masalalariga bag‘ishlangan yig‘ilishda ma’lum qildi.

Yig‘ilishda ehtiyojmand aholining ijtimoiy reyestriga kiritish tizimini yil yakuniga qadar qayta ko‘rib chiqish topshirildi. Bunda oilaning daromadi bilan birga surunkali kasallik, nogironlik, ko‘p farzandlilik va oila a’zosining xorijda ishlashi kabi omillar ham hisobga olinadi.

Ta’kidlanishicha, mamlakatda kambag‘allik darajasi 3,9 foizga tushgan. Biroq 3 yoshgacha farzandi bor oilalarda bu ko‘rsatkich 6,5 foizni tashkil etmoqda.

Shuningdek, mehnatga layoqatsiz ehtiyojmand oilalarga daromad keltiruvchi ijtimoiy paket uchun joriy yilda 300 milliard so‘m ajratilgan. Ushbu yordamdan foydalangan 11 ming oilaning qariyb yarmida daromad sezilarli oshgani qayd etildi.

Kelasi yildan ijtimoiy reyestrga kiritilgan oilalarning farzandlari uchun davlat va xususiy bog‘cha to‘lovi, o‘quv markazlari, yo‘lkira hamda oliy ta’lim muassasalaridagi yotoqxona xarajatlari 12 oylik vaucher orqali qoplab beriladi.

Vaucher oila ijtimoiy reyestrdan chiqarilganidan keyin ham amal qilishi belgilangan.