Prezidentimiz Olmazor tumanida huquqbuzarliklarning oldini olish bo‘yicha yo‘lga qo‘yilgan yangi ish uslubi natijalarini ham tahlil qildi.

Yil boshidan tumanga Huquqni muhofaza qilish akademiyasining professor-o‘qituvchilari biriktirildi. Ular 23 nafar tergovchi bilan hamkorlikda hududda ko‘p uchraydigan jinoyatlarning oldini olish va tergov samaradorligini oshirishga qaratilgan zamonaviy metodikalarni amaliyotga joriy etmoqda.

Shuningdek, Akademiyaning 20 nafar talabasi dual ta’lim asosida tajribali tergovchilar va profilaktika inspektorlariga biriktirildi. Bu yoshlarning amaliy tayyorgarligini kuchaytirish bilan birga, mahallalarda profilaktika tadbirlarini samarali tashkil etishga ham xizmat qilmoqda.

Amalga oshirilgan ishlar natijasida tumandagi 64 ta mahallaning 13 tasida jinoyat sodir etilmadi, kriminogen vaziyati og‘ir toifadagi mahallalar qolmadi. Ayollar ishtirokidagi jinoyatlar 22 tadan 10 taga kamaydi, muqaddam jazo o‘tagan shaxslar tomonidan takroran jinoyat sodir etish holatlari esa kuzatilmadi.

Shu bilan birga, yoshlar o‘rtasidagi jinoyatchilik hamda tan jarohati bilan bog‘liq holatlar hali ham alohida e’tibor talab qilishi qayd etildi.

Yoshlar o‘rtasida huquqbuzarliklarni keskin kamaytirish bo‘yicha samarali profilaktika mexanizmlarini ishlab chiqish va Olmazor tajribasini shakllantirish vazifasi belgilandi.