Kongo Demokratik Respublikasida Ebola virusi bilan tasdiqlangan kasallanish holatlari 7 022 taga yetdi. Virus mamlakatning yettinchi viloyati — Janubiy Ubangiga ham tarqaldi. Bu haqda Reuters xabar berdi.

Hukumat ma’lumotlariga ko‘ra, epidemiya oqibatida 3 398 kishi vafot etgan. Kasallanish holatlari mamlakatning yetti viloyatida qayd etilgan.

Hozirgi epidemiyaga Ebolaning Bundibugyo turi sabab bo‘lmoqda. U 2018–2020-yillardagi epidemiyani ortda qoldirib, Kongo Demokratik Respublikasi tarixidagi eng yirik va eng ko‘p o‘limga sabab bo‘lgan Ebola epidemiyasiga aylangan.

Epidemiya ko‘lami bo‘yicha ushbu holat 2014–2016-yillarda G‘arbiy Afrikada yuz bergan Ebola epidemiyasidan keyin ikkinchi o‘rinda turibdi. O‘sha davrda Gvineya, Liberiya va Syerra-Leoneda 28,6 mingdan ortiq kishi kasallangan, 11 mingdan ziyod odam vafot etgan.

Janubiy Ubangi viloyatida aniqlangan dastlabki holat asosiy epidemiya o‘chog‘idan ancha uzoqda qayd etilgan. 23 yoshli erkak 8-sentabr kuni vafot etgan va unda Bundibugyo turidagi Ebola virusi aniqlangan.

Rasmiylar birinchi tasdiqlangan bemor bilan aloqada bo‘lgan shaxslarni aniqlash va ularni kuzatish ishlarini olib bormoqda. Jahon sog‘liqni saqlash tashkiloti esa epidemiyaning geografik jihatdan kengayib borayotgani fonida malakali xodimlar, hamkor tashkilotlar va mablag‘ yetishmasligi virusga qarshi kurashni qiyinlashtirayotganini ma’lum qilgan.