Huquqni muhofaza qiluvchi organlar tomonidan o‘tkazilgan tezkor tadbirlar davomida giyohvandlik vositalarining noqonuniy muomalasi bilan bog‘liq uchta holat fosh etildi.

Xorazm viloyatining Tuproqqal’a tumanida “Surxondaryo–Xorazm” yo‘nalishida harakatlangan “Lasetti” rusumli avtomobil to‘xtatilib, tekshirildi. Unda yo‘lovchi sifatida ketayotgan, avval giyohvandlik bilan bog‘liq jinoyat uchun ikki marta sudlangan shaxsdan 490 gramm opiy moddasi aniqlandi. Dastlabki ma’lumotlarga ko‘ra, mazkur modda qo‘shni davlatdan noqonuniy olib kirilib, Xorazmda sotilishi rejalashtirilgan.

Yana bir holatda “Toshkent–Xorazm” yo‘nalishida harakatlangan “Oniks” rusumli avtomobil yo‘lovchisidan 119 gramm gashish moddasi olib qo‘yildi.

Shuningdek, Sirdaryo viloyatining Oqoltin tumanida “Sirdaryo–Jizzax” yo‘nalishida harakatlangan “Lasetti” rusumli avtomobil tekshirilgan. Avtomobil haydovchisining oyoq kiyimi ichidan 16 gramm opiy moddasi aniqlanib, ashyoviy dalil sifatida rasmiylashtirildi. Mazkur shaxs avval giyohvandlik vositalari bilan bog‘liq jinoyat uchun sudlangan.

Aniqlangan holatlar yuzasidan tegishli shaxslarga nisbatan jinoyat ishlari qo‘zg‘atilgan. Hozirda tergov harakatlari olib borilmoqda.