2025 йилда Соғлиқни сақлаш, Мактабгача ва мактаб таълими вазирликлари ҳамда маҳаллий ҳокимликларда энг кўп коррупсион жиноятлар содир этилган. Бу ҳақда 6 февраль куни Тошкентда ўтган матбуот анжуманида Коррупцияга қарши курашиш агентлиги раҳбари Акмал Бурханов маълум қилди, – дея хабар бермоқда Газета.

Манбага кўра, 2024 йилда 5716 та коррупсион жиноят аниқланган бўлса, бу 2025 йилда 5222 тани ташкил этган ва 8,6 фоизга камайиш тенденцияси кузатилган.

2025 йилда ҳудудлар кесимида коррупсион жиноятлар Фарғона ва Сурхондарё вилоятларида ортган, Хоразм, Қашқадарё, Тошкент ва Самарқанд вилоятларида эса камайган.

“12 нафар туман ва шаҳар даражасидаги ҳокимлар коррупция сабабли жавобгарликка тортилди. Бундай жиноятларнинг 300 дан ортиғи маҳаллий ҳокимликларга тўғри келади. Уларнинг ҳам аксарияти, яъни 80 фоиздан зиёди ҳоким ёрдамчилари билан боғлиқ. Биз буни ўрганиб, таҳлил қилдик. Бу ерда жуда ҳам кўп коррупсиявий омиллар бўлгани учун уларда мана шу жиноятлар кўп содир этилган”, — дейди Акмал Бурханов.

“Биз ҳозирги кунда субсидия ва имтиёзли кредитларни инсон омилисиз, яъни ҳоким ёрдамчиси ва “маҳалла еттилиги”га боғлиқ бўлмаган ҳолда ажратиш ва инсон омилисиз рақамлаштириш чораларини кўрдик. Ўйлайманки, 2026 йилда ҳоким ёрдамчилари томонидан содир этиладиган коррупсиявий жиноятлар салмоғи кескин камайишига эришилади”, — дея қўшимча қилди Антикоррупсия агентлиги раҳбари.

Унинг сўзларига кўра, ўтган йили ҳокимликлар кесимида энг кўп коррупсиявий жиноятлар Тошкент шаҳри (612 та), Тошкент (584 та) ва Фарғона (455 та) вилоятларида содир этилган.

• Жиноят
• Коррупция
• ҳоким