Афғонистонда кучли қор бўронлари оқибатида камида 61 киши ҳалок бўлди, 110 киши жароҳат олди. Бу ҳақда Афғонистон Табиий офатлар оқибатларини бартараф этиш миллий бошқармаси хабар берди.

Хабарга кўра, сўнгги 3 кун ичида мамлакатнинг турли вилоятларида кучли ёмғир ва қор ёғиши оқибатида 61 киши вафот этган, яна 110 киши турли даражада тан жароҳати олган.

AND маълумотларига кўра, қурбонлар ва жабрланганлар ҳақидаги хабарлар Қобул, Парвон, Панжшер, Бомиён, Дайкунди, Майдан-Вардак, Ғазни, Ҳирот, Ғор, Бадғис, Фарёб, Сари-Пул, Балх, Саманган ва Нуристон вилоятларидан келиб тушган.

Шунингдек, табиий офат оқибатида 458 та уй тўлиқ ёки қисман вайрон бўлган, бунинг оқибатида 360 та оила зарар кўрган. Ноқулай об-ҳаво шароити сабаб 620 бош чорва моллари ҳам нобуд бўлган.

Мамлакатда 20 дан 23 январгача давом этган қор бўронлари, айниқса инфратузилмаси заиф, табиий офатларга чидамсиз тоғли ва қишлоқ ҳудудларида катта зарар етказган.

Афғонистон метеорологларининг прогнозларига кўра, мамлакатда қор ёғни кейинги ҳафтада ҳам давом этади.

• Афғонистон
• Об-ҳаво
• Qor
• Табиий офат
• yomg‘ir