ИИВ Жамоат хавфсизлиги департаменти ахборот хизмати хабарига кўра, 13 июнь куни кечқурун Чирчиқ шаҳридаги тунги клублар, кафе, барлар ва бошқа шу каби кўнгилочар муассасаларда гиёҳвандлик воситаларининг ноқонуний муомаласига қарши курашиш доирасида ички ишлар органлари ходимлари томонидан тезкор-профилактик тадбирлар ўтказилган.

Рейд давомида Навоий кўчасида жойлашган барлардан бирида ҳуқуқни муҳофаза қилувчи органлар ходимларининг эътиборини хатти-ҳаракатлари шубҳа уйғотган ёш йигит тортди. Ҳужжатлари текширилаётган вақтда у сезиларли даражада ҳаяжонланган. Холислар иштирокида ходимлар унинг шахсий буюмларини кўздан кечиришганда, йигитнинг ёнида бўлган барсетка ичида ўзига хос ўткир ҳидга эга бўлган, яшил рангли қуритилган ўсимликсимон модда солинган полиэтилен пакет аниқланган.

Ушбу ҳолат юзасидан гиёҳвандлик воситаси аломатларига эга бўлган моддани олиб қўйиш тўғрисида баённома расмийлаштирилиб, тўпланган материаллар белгиланган тартибда рўйхатдан ўтказилган олиб қўйилган модда эса суд-кимёвий экспертизага юборилган.

Суд-кимёвий экспертизаси хулосасига кўра, олиб қўйилган модда марихуана эканлиги аниқланди. У фаол гиёҳванд модда — тетрагидроканнабинолни ўз ичига олган қуритилган ва майдаланган ўсимлик қисмларидан иборат бўлган. Гиёҳвандлик воситасининг умумий оғирлиги 1,45 граммни ташкил этди.

Мазкур ҳолат юзасидан Қибрай туманида яшовчи 22 ёшли фуқарога нисбатан Ўзбекистон Республикаси Жиноят кодексининг 276-моддаси 1-қисми (“Ўтказиш мақсадини кўзламасдан гиёҳвандлик воситалари, уларнинг аналоглари ёки психотроп моддаларни қонунга хилоф равишда тайёрлаш, олиш, сақлаш ва бошқа ҳаракатлар”) билан жиноят иши қўзғатилди.

• Departament
• Гиёҳвандлик
• ИИВ
• Jamoat xavfsizligi
• Жиноят