Тошкент вилояти Бўстонлиқ туманидаги Чорвоқ сув омборида чўкиб кетган уч кишидан бирининг жасади топилди. Бу ҳақда Фавқулодда вазиятлар вазирлиги хабар берди.

Маълум қилинишича, ҳодиса 2-сентябрь куни “Бурчмулла” маҳалласи ҳудудида содир бўлган. Ота ва унинг икки ўғли катерда сайр қилиш вақтида чўмилиш тақиқланган ҳудудга бориб, қутқарув нимчаларисиз сувга тушган. Шундан сўнг учаласи ҳам чўкиб кетган.

Хабар келиб тушиши билан ФВВнинг ғаввос-қутқарувчилари воқеа жойига етиб бориб, қидирув ишларини бошлаган. Қидирув ҳудудининг кенглиги ва сув омборининг чуқурлиги сабабли ҳодиса жойида махсус штаб ташкил этилган.

Қидирув ишларига Жиззах ва Сирдарё вилоятлари Фавқулодда вазиятлар бошқармаларининг қўшимча кучлари ҳам жалб қилинган. Жараёнда зарур техника ва замонавий қидирув воситаларидан фойдаланилмоқда.

Қайд этилишича, бугун соат 13:02 да чўкиб кетган фуқаролардан бирининг жасади топилган.

Ҳодиса қандай содир бўлган?

Дастлабки маълумотларга кўра, оила Чорвоқ сув омборида катерда сайр қилган ва суратга тушиш мақсадида чўмилиш тақиқланган ҳудудда тўхтаган. Кейинчалик улар шу жойда чўмилишга қарор қилган.

Катер ҳайдовчиси сувга тушишдан аввал қутқарув нимчаларини кийишни тавсия қилган, бироқ фуқаролар унинг тавсиясига амал қилмаган.

Сувга тушган болалардан бирининг оёғи тортишиб қолган. Уни қутқариш учун отаси сувга тушган, кейин иккинчи ўғил ҳам сувга кирган. Натижада ота ва унинг икки ўғли кетма-кет сувга чўкиб кетган.

Ҳодиса вақтида ҳудудда шамол бўлиб, сувда тўлқин кузатилган. Катер ҳайдовчиси ҳам фуқароларни қутқаришга уринган, бироқ уларни сувдан чиқаришга муваффақ бўлмаган.

Айни пайтда қолган икки фуқаронинг жасадини топиш бўйича қидирув ишлари давом эттирилмоқда.