Париждаги Эйфел минорасида ҳинду диний делегацияси ташрифи вақтида аёл ходимлар иш жойларини тарк этишга мажбурлангани ҳақидаги хабарлар юзасидан текширув бошланди. Бу ҳақда Reuters хабар берди.

Ҳодиса 6-сентабр куни BAPS номи билан танилган ҳинду диний ташкилотига алоқадор қарийб 100 кишилик делегациянинг Эйфел минорасига ёпиқ ташрифи вақтида содир бўлгани айтилмоқда.

Касаба уюшмаси вакили Диан Давуаннинг Реутерсъга маълум қилишича, делегация ўтиб кетаётган пайтда аёл ходимлардан иш жойларини тарк этиш ва уларнинг ўрнига эркак ҳамкасбларини қўйиш сўралган. Бу ҳолат ходимлар орасида норозиликка сабаб бўлган.

7-сентабр куни ходимлар воқеани муҳокама қилиш ва раҳбарият билан учрашиш учун йиғилган. Шу сабабли Эйфел минораси одатдагидан кечроқ очилган. Кириш қисмида кечикиш “операцион сабаблар” билан изоҳланган.

Давуаннинг сўзларига кўра, минора маъмурияти ходимлардан юз берган ҳолат учун узр сўраган.

Париж мери Эммануэл Грегуар воқеа юзасидан тезкор текширув ўтказилишини маълум қилган. U ходимларнинг норозилиги асосли эканини таъкидлаб, ҳодисага олиб келган барча ҳолатлар аниқланиши кераклигини билдирган.

BAPS ташкилоти ҳам воқеа юзасидан баёнот бериб, делегация ташрифи ташриф буюрувчиларга халақит бермаслик мақсадида Эйфел минораси очилиши билан бир вақтга режалаштирилганини маълум қилган. Ташкилот вакиллари ўзларига маълум маълумотларга кўра, ҳеч кимнинг минорага киришига тўсқинлик қилинмаганини билдирган. Шу билан бирга, юзага келган ноқулайлик учун узр сўраган.

Франция Миллий ассамблеяси раиси Яэл Браун-Пиве ҳам ҳолатга муносабат билдирган. U Францияда аёллар жамоат ҳаётида эркаклар билан тенг ҳуқуқда иштирок этишини таъкидлаб, бошқа маданият ва дин вакилларини қабул қилиш мамлакатнинг асосий қадриятларидан воз кечишни англатмаслигини қайд этган.

Маълум қилинишича, BAPS делегацияси Францияга Париж яқинида ҳинду ибодатхонаси очилиши муносабати билан ўтказилган тадбирларда иштирок этиш учун келган.