10-сентябрдан Тошкент–Андижон йўналишида замонавий тезкор CРРC-Далиан электропоезди қатнови йўлга қўйилади. У амалдаги 730/729-сонли поезд ўрнида ҳаракатланади. Бу ҳақда “Ўзтемирйўлйўловчи” хабар берди.

730-сонли Тошкент–Андижон электропоезди Тошкентдан соат 09:20 да жўнайди. Поезд Ангренга 10:25 да, Попга 12:00 да, Қўқонга 12:28 да, Марғилонга 13:00 да етиб бориб, Андижонга 13:35 да келади.

Қайтиш йўналишидаги 729-сонли электропоезд Андижондан 15:38 да йўлга чиқади. У Марғилонга 16:11 да, Қўқонга 16:43 да, Попга 17:11 да, Ангренга 18:50 да етиб боради. Поезд Тошкентга 19:53 да келади.

Янги электропоезд 4 та эконом-класс вагонидан иборат бўлиб, жами 357 та йўловчи ўрни мавжуд.

Шунингдек, 10-сентябрдан Тошкент–Андижон йўналишидаги қатор йўловчи поездларининг ҳаракат жадвалига ҳам ўзгартиришлар киритилади.

Жумладан, 96-сонли Тошкент–Андижон поезди 10-сентябрдан Тошкентдан 04:55 да жўнаб, Андижонга 11:43 да етиб боради. 98/94-сонли поезд эса Тошкентдан 07:14 да йўлга чиқиб, Андижонга 13:48 да етиб келади.

Бундан ташқари, Водий ичидаги айрим йўналишларда ҳам поездларнинг ҳаракат жадвали янгиланади.

Йўловчиларга сафарга чиқишдан аввал поездларнинг янгиланган ҳаракат жадвалини текшириш тавсия этилди.

Эслатиб ўтамиз, август ойи охирида Тошкент–Андижон йўналишида янги тезкор электропоезд синовдан ўтказилган эди.