Маълумотларга кўра, Туркия президенти Ражаб Тоййиб Эрдўғaн Исроилнинг Ғазо секторидаги ҳаракатларини яна бир бор танқид қилди. У Исроил бош вазири Бинямин Нетаняхуни яна Адолф Гитлерга қиёслади. Бу ҳақда “Hurriyet” хабар берди.

Туркия президенти Исроил ҳукумати фаластинликларнинг “мисли кўрилмаган қирғинлари” учун жазоланишини айтди.

“Биз ҳақиқатни фош қилишда ва Исроил содир этган қотилликлар ҳақида гапиришда давом этамиз. Ҳамма тушунсин, Нетаняху замонамизнинг Гитлери ва унинг шериклари жавобгарликдан қочиб қутула олмайди. Эртами-кечми адолат, судда бўлмаса, тарих олдида ғалаба қозонади”, — деди Туркия президенти.

Шунингдек, Эрдўғaн Исроилни оммавий ахборот воситалари ходимларига ҳужум қилишда айблади. Туркия президентининг сўзларига кўра, бу билан Исроил расмийлари Ғазо секторидаги “оммавий қотиллик” изларини ўчириб ташламоқчи.

“Улар қандай ҳаракат қилмасин, биз Исроил томонидан содир этилган жиноятларга оид барча ҳужжатларни Халқаро судга топширдик ва буни давом эттирамиз”, — деди сиёсатчи.

Эслатиб ўтамиз, Туркия президенти 2023 йил ҳам Нетаняхуни Ғазода содир этган ҳарбий жиноятларини Гитлер бошчилигидаги фашистлар режимининг ҳаракатларига қиёслаганди.

• Adolf Gitler
• Binyamin Netanyaxu
• Эрдоған
• Isroil
• Туркия