Францияда ўқувчилар намойишлари фонида 5 октябрь куни 400–500 та мактабда дарслар тўлиқ ёки қисман тўхтатилади. Бу ҳақда мамлакат таълим вазири Эдуар Жефре 4 октябрь куни маълум қилди.

Вазирнинг айтишича, мактабларда хавфсизлик шароитлари таъминланмагани сабабли таълим жараёни вақтинча тўхтатилади. Намойишлар бошланганидан буён мамлакатдаги 24 та мактаб ёқиб юборилган ёки талон-торож қилинган, 78 нафар таълим ходими эса жароҳатланган.

Ҳукумат дарсларни босқичма-босқич ва қисман тиклашни режалаштирмоқда. Жефренинг қайд этишича, жароҳатланган таълим ходимлари атайлаб нишонга олинган. Вазир намойишларга сиёсий фаоллар, хусусан, ўта сўл гуруҳлар ҳам қўшилиб, зўравонликни кучайтирганини таъкидлаган.

Намойишлар ўқувчиларнинг таълим тизимининг етарли даражада молиялаштирилмаётгани ҳақидаги норозилиги билан боғлиқ. Улар синфларнинг гавжумлиги, айрим синфларда 40 нафаргача ўқувчи бўлиши, мактаб биноларининг эскиргани, ўқитувчилар маоши ва ходимлар етишмаслиги, шунингдек, университетларга ҳужжат топшириш тизими ҳамда иссиқ кунларда синфхоналардаги шароитлардан норози бўлган.

Ҳозирча ҳукумат хавфсизлик вазиятидан келиб чиқиб, мамлакатдаги юзлаб мактабларда дарсларни чеклаган ва таълим жараёнини босқичма-босқич тиклашни режалаштирмоқда.