5 октябрь куни Ўзбекистон Президенти Шавкат Мирзиёев Тожикистон Президенти Имомали Раҳмон билан телефон орқали мулоқот қилди. Суҳбат давомида Ўзбекистон етакчиси Тожикистон раҳбарини таваллуд куни билан табриклаб, унга мустаҳкам соғлиқ, бахт-саодат ва давлат бошқарувидаги фаолиятида муваффақиятлар тилади. Бу ҳақда Президент матбуот хизмати хабар берди.

Мулоқотда Ўзбекистон ва Тожикистон ўртасидаги дўстлик, яхши қўшничилик, стратегик шериклик ва иттифоқчилик муносабатларини янада ривожлантириш масалалари муҳокама қилинди.

Томонлар ҳамкорликнинг барча йўналишларда фаоллашиб бораётганини қайд этди. Товар айирбошлаш ҳажми ўсаётгани, транспорт, энергетика, геология, қишлоқ ва сув хўжалиги соҳаларида ўзаро манфаатли шериклик давом этаётгани таъкидланди.

Шунингдек, ҳудудлар ўртасидаги ҳамкорлик ва маданий-гуманитар алмашинувлар масалалари кўриб чиқилди. Етакчилар минтақавий кун тартибидаги масалалар юзасидан фикр алмашиб, бўлажак икки томонлама ва кўп томонлама тадбирлар режасини муҳокама қилди.