«Навоий конь-металлургия комбинати» АЖ 2026 йилнинг биринчи ярим йиллиги учун молиявий ҳисоботини эълон қилди. Унга кўра, компаниянинг олти ойлик соф фойдаси 2 млрд 382 млн долларни ташкил этиб, 2025 йилнинг шу даврига нисбатан 57,2 фоизга ошган.

Ҳисобот даврида НКМКнинг соф тушуми 7 млрд 67 млн долларга етган. Бу кўрсаткич ўтган йилнинг биринчи ярим йиллигига нисбатан 49,9 фоизга юқори. Компания ўсишнинг асосий омили Лондон қимматбаҳо металлар биржасида олтин нархининг сезиларли ошиши бўлганини маълум қилган.

Шу билан бирга, олтин ишлаб чиқариш ҳажми 1,51 млн трой унцияни ташкил этиб, 2025 йилнинг мос даврига нисбатан 1,8 фоизга камайган. Бир унция олтин ишлаб чиқариш таннархи эса 1 647 долларга етган. Бир йил аввал бу кўрсаткич 1 164 долларни ташкил қилган.

Компания таннарх ошишини, жумладан, олтин нархи юқорилагани сабабли роялти тўловларининг кўпайиши, инфляциянинг материаллар қийматига таъсири ва «Мурунтов» конидаги инвестицион лойиҳа харажатларининг ортиши билан изоҳлаган. Шунингдек, сўмнинг АҚШ долларига нисбатан 6,1 фоизга мустаҳкамланиши бир унция олтин ишлаб чиқариш таннархининг 101 долларга ошишига таъсир қилган.

НКМК дунёдаги йирик олтин ишлаб чиқарувчилардан бири бўлиб, компанияда 50 мингдан ортиқ ишчи-ходим фаолият юритади. Унинг ишлаб чиқариш инфратузилмаси Ўзбекистондаги 12 дан ортиқ йирик конь ва 10 та қайта ишлаш корхонасини ўз ичига олади.