Қирғизистон президенти Садир Жапаров Доғистондаги теракт муносабати билан Россия федерацияси президенти Владимир Путинга ҳамдардлик телеграммасини юборди.

Жапаров жабрланганларнинг қариндошлари ва дўстларига ҳамдардлик билдириб, ҳужумлар натижасида жабрланганларнинг тез тузалиб кетишини тилаган. Шунингдек, Қирғизистон раҳбари терроризмнинг барча турларига қатъий қарши эканлигини ва Россия ҳукуматининг миллий хавфсизлигини таъминлаш борасидаги саъй-ҳаракатларини қўллаб-қувватлашини таъкидлаган.

Эслатиб ўтамиз, 23 июнь куни кечқурун номаълум шахслар Дербентдаги ибодатхона ва черковга ўқ узган. Шунингдек, Махачқалъада полиция ходимларига қуролли ҳужум уюштирилган. Доғистон ички ишлар вазирлигининг маълумотларига кўра, ҳужум натижасида олти киши ҳалок бўлган, 12 полиция ходими яраланган. Аввалроқ, Доғистонда жангарилар Махачқалъа ва Дербентдаги ибодатхоналар ва черковларга ҳужум қилганидан кейин уч кунлик мотам эълон қилинган эди.

• Ҳамдардлик
• Japarov
• Путин