Конго Демократик Республикасининг шарқий қисмида жойлашган Букаву шаҳрида мактаб ҳудудида ёнғин содир бўлди. Ҳодиса оқибатида камида 24 нафар ўқувчи ҳалок бўлган, 29 киши турли даражадаги жароҳатлар билан тиббиёт муассасаларига олиб кетилган.

Маҳаллий маъмурият маълумотларига кўра, ҳалок бўлганлар орасида 19 нафар қиз ва 5 нафар ўғил бола бор. Жароҳатланганлардан 21 нафари оғир аҳволда бўлиб, реаниматсия бўлимида даволанмоқда.

Ёнғин натижасида икки мактаб биноси ҳамда 300 га яқин ёғоч уй вайрон бўлган. Воқеа жойига тез ёрдам ва қутқарув хизматлари жалб этилиб, ҳалок бўлганлар ва жароҳатланганларни ҳудуддан олиб чиқиш ишлари амалга оширилган.

Гувоҳларнинг маълум қилишича, ёнғин тушдан кейин бошланган ва қисқа вақт ичида атрофдаги биноларга тарқалган. Ёнғин ўчирилганидан кейин ҳам вайроналар орасидан тутун чиқиши давом этган.

Ҳозирча ёнғиннинг келиб чиқиш сабаби расман маълум қилинмаган. Воқеанинг сабаб ва ҳолатларини аниқлаш, шунингдек, қурбонлар сони бўйича якуний маълумотларни олиш мақсадида тергов ишлари олиб борилмоқда.